Eglwys y Bryn Groeslon - Brynrodyn/Brynrhos
Enw’r Eglwys: Eglwys Y Bryn
Lleoliad a Chôd Post yr Eglwys: Y Groeslon, Caernarfon LL54 7DL (Bryn Rhos) LL54 7ES (Brynrodyn)
Gweinidog yr Eglwys: Y Parchg Gwenda Richards B.Ed., B.D. abermenai@btinternet.com
Swyddogion yr Eglwys:
- Mrs Mari Vaughan Jones Ysgrifennydd
- Mr Bleddyn Jones – Ysgrifennydd y Cyhoeddiadau
- Mr Curig Pritchard - Trysorydd
- Dr Tudor Ellis
- Mrs Glenys Hughes-Jones
- Mr Dafydd Jones
- Mr Meirion Williams
- Mr John Arthur Jones
- Mrs Nesta Thomas
Amseroedd Cyfarfodydd yr Eglwys (hy cyfarfodydd wythnos ac oedfaon y Sul)
- Oedfa bore Sul - 10.00 AM
- Seiat bob yn ail bore Mercher yn y gaeaf am10am
- Cymdeithas Lenyddol bob yn ail nos Fawrth yn y gaeaf am 7pm
Daeth Eglwys y Bryn i fodolaeth trwy uno dwy gynulleidfa Brynrhos a Brynrodyn, Y Groeslon. Bu’r uniad yn llwyddiant. Addolir yn y ddau gapel ar yn ail. Un achos oedd yma yn y ddeunawfed a’r bedwaredd ganrif ar bymtheg cyn i’r eglwys ymrannu yn 1880 i ffurfio eglwys Brynrhos oherwydd y pellter i’r henoed a’r plant i gerdded deirgwaith y Sul o ardal Penfforddelen i lawr i Frynrodyn. Bellach y mae’r eglwys yn rhan o ofalaeth Bro Lleu dan weinidogaeth y Parchg Deian E. Evans.
Ganllath o gopa’r mynydd…’
 |
Dydd Sadwrn, 11 Gorffennaf 2015, fel rhan o ŵyl undydd i ddathlu tirwedd a llenyddiaeth Dyffryn Nantlle cafwyd cyfle i weld Cadair Eisteddfod Genedlaethol Bae Colwyn 1910 yn y Neuadd Goffa ym Mhenygroes. Dyma Gadair Bardd yr Haf, sef y gadair a enillodd R.Williams Parry am ei awdl ‘Yr Haf’ yn yr Eisteddfod honno. Roedd y Neuadd dan ei sang a’r wefr yn drydannol wrth i bawb fanteisio ar y cyfle i dynnu llun y Gadair a roddwyd ar fenthyg i Benygroes am gyfnod byr iawn ar y diwrnod arbennig hwnnw.
Yn dilyn hynny, aeth tua cant o bobl ar daith gerdded yng nghwmni’r bardd a’r newyddiadurwraig Karen Owen. Cawsom ein tywys ar draws y Dyffryn i fannau oedd â chyswllt agos â Bardd yr Haf, a braint fu gwrando ar Karen yn egluro’r cysylltiadau hynny yn hynod o ddiddorol. Yn ystod y daith gofynnwyd i bawb adrodd soned enwg R Williams Parry i’r ‘Llwynog’ a dyna brofiad fu bod yn rhan o Gôr Adrodd enfawr a’r geiriau’n diasbedain ar draws y Dyffryn.
Dwyawr o daith hynod o gofiadwy a chyfle ar y diwedd i rannu argraffiadau uwchben panad yng nghaffi Pant Du.
Bu taith gerdded yn ystod y bore yng nghwmni Twm Elias a chafwyd cyfle yn yr hwyr i holi Eric Jones, yr anturiaethwr.
Diolch i bawb a drefnodd yr Ŵyl, yn arbennig Angharad Tomos. Edrychwn ymlaen at yr Ŵyl y flwyddyn nesa.
Am fwy o luniau, cliciwch yma.
 |
Sul gwahanol i'r arfer
Oedfa wahanol iawn i’r arfer ddaeth i ran 31 o aelodau Eglwys Horeb Rhostryfan, Eglwys Carmel ac Eglwys y Bryn, y Groeslon ddydd Sul 5 Gorffennaf , 2015
Trefnwyd Pererindod i Eglwys Llanycil ger y Bala i ymweld â Chanolfan Byd Mari Jones. Bu edrych ymlaen at weld y Ganolfan sydd wedi derbyn cymaint o ganmoliaeth o bob cyfeiriad. Prynwyd yr eglwys a'r safle gan Gymdeithas y Beibl, a'i haddasu i leoli arddangosfa gwerth chweil ar gyfer ymwelwyr o bob rhan o'r byd.
Paned oedd y peth cyntaf ar yr agenda, a hynny yn yr ystafell bwrpasol sydd yn lleoli caffi a gweithdy, cyn cael sgwrs hamddenol gan Nerys Siddal rheolwraig y ganolfan. Fel rhan o'i chyflwyniad dangoswyd ffilm yn dangos y gwaith enfawr a wnaethpwyd yn y ganolfan.
Symud wedyn i’r Eglwys a chynnal oedfa fer yno dan arweiniad Dr Tudor Ellis, cyn treulio gweddill yr amser yn mwynhau'r arddangosfa sydd yn troi o amgylch stori gyfarwydd ymweliad Mari Jones â Thomas Charles, y Bala.
Ymlaen â ni wedyn i westy'r Eryrod yn Llanuwchllyn i fwynhau pryd bwyd blasus wedi ei baratoi gan Eleri a'i chriw. Cafwyd mwy na digon o fwyd a phawb wedi ei blesio.
Bu'r diwrnod yn llwyddiant drwyddo draw a phawb yn awyddus i weld y digwyddiad yn un blynyddol ar galendr y dair eglwys.
Bleddyn Jones
Gwybodaeth i ddilyn yn fuan...
Clwb Ieuenctid Eglwysi Bro Lleu
Mae y clwb wedi ei sefydlu ers dwy flynedd. Cynhelir y clwb bob dydd Mawrth rhwng pedwar a chwech o’r gloch y prynhawn. Trefnir amrywiaeth o weithgareddau hwyliog ar gyfer yr aelodau, yn gemau, gweithgareddau elusennol, gwaith creadigol ac, wrth gwrs, cyfle i adnabod Crist yn well.
Mae croeso i unrhyw un rhwng 11 a 16 mlwydd oed ymaelodi.
Am wybodaeth pellach cysylltwch a’r Gweinidog, y Parch. Deian Evans.
Gwybodaeth i ddilyn yn fuan...
Isod mae lluniau Eglwys y Bryn. I weld y lluniau i gyd - cliciwch yma
Eglwys y Bryn, Groeslon
Chapel Brynrodyn, Dolydd